2018-Йили Тутқун Қилинған Нахшичи Аблажан Авут Йеңи Нахшилири Билән Қайта Оттуриға Чиқти
11 йиллиқ кәсилгәнлики хәвәр қилинған Аблажан Авут Аюп (бәзи мәнбәләрдә Аблажан Авут дәпму елинған) бир синда намаян болған болуп, арқа көрүнүш сүрәтлиридә бу синниң мушу йили сүрәткә елинғанлиқи көрүлмәктә, у йәнә әтрапидики кишиләр тарқатған сүрәтлирдиму көрүлгән. Униң қачан вә қандақ шәртләр билән қоюп берилгәнлики техи дәлилләнмиди.
9-Өктәбир «Көзәт» көздин кәчүргәни матириялларниң көрситишичә, 2018-йили из-дәрәксиз йоқ қиливәтилгән вә кейин 11 йиллиқ түрмә җазасини өтәватқанлиқи хәвәр қилинған уйғур мода нахшичиси Аблажан Авут Аюп йеңи бир музикилиқ син, қайта тарқитилған нахшилар топлими вә әтрапидикиләр тарқатған сүрәтләр билән қайтидин оттуриға чиққан.
«Мукәммәл» (хитайчә: 完美) дәп аталған бу син, нахшичиниң хитайчә исми киргүзүлгән рәсим билән башланған болуп, 2026-йил ишләнгәнлики мәлум. 9-өктәбир Шаухоңшуда «barber~Alim» намидики таратқу һесаби тәрипидин Аблажанниң исми вә нахша мавзуги хәткуч қилинип елан қилинған. Униң арқа көрүнүш сүрәтлиридә, синдикигә охшап кетидиған бир әрниң чәчини пасонға кәлтүрүватқанлиқи көрситилгән. Униң сарғайтилған, тик қилип таралған чәчи нахшичи Гүлмирә Турғун «йерим йил бурун чүшкән рәсим» дейилгән сүрәттики Аблажанниң чәчигә мас келиду. Бу сүрәтләр бирлишип бу синниң мушу йили сүрәткә елинғанлиқини көрситип бәрмәктә.
Бу синниң елан қилиниши, мәстанилири тәрипидин «AJ» дәп тонулған Аблажанниң аммиви сорунға қайтип кәлгәнликиниң һазирғичә көрүлгән әң гәвдилики ипадисидур. Хитайниң иҗтимаий алақә супилирида тарқиливатқан бәзи сүрәтләр вә синларда униң аммиви сорунларда күлүмсирәп турғанлиқи көрүлиду. Гүлмирә Турғунму иккисиниң биллә чүшкән сүрәтлирини һәмбәһрилигән. Син билән бирлиштүрүп қариғанда, бу матирияллар униң түрмидин чиққанлиқи һәққидики хәвәрләрниң растлиқини күчәйтиду, әмма униң қачан вә қандақ шәртләр астида қоюп берилгәнлики йәнила намәлум.
Көзәт тори Аблажанниң өзи, вәкиллири яки синни ишләнгәнлики тилға елинған Шиңвәйшиң музика ширкити (星外星音乐) билән бу синниң сүрәткә елинған вақтини дәлиллимиди.
Хитай һөкүмити уйғурлар вә башқа мусулман түркий милләтләрни кәң көләмдә тутқун қиливатқан мәзгилдә, Аблажанму тутқун қилинған; Америка бу һәрикәтни ирқий қирғинчилиқ вә инсанияткә қарши җинайәт дәп бекиткәниди. Хитай бу әйбләшләрни рәт қилған һәмдә бу орунларни әсәбиликкә тақабил туруш үчүн қурулған «кәспий тәрбийиләш мәркәзлири» дәп атаған иди.
Син Немини Көрситиду?
«Мукәммәл» намлиқ син «阿卜拉江 AblajanAwutAyup» намидики бир Үндидар һесабида көрүлгән. Тәхминән үч минутлуқ бу синда рәңдар чирағлар астидики уссуллуқ нахша көрүнүшлири бар болуп, униң илависидә синни Шиңвәйшиң музика ширкитиниң ишләнгәнлики қайт қилинған.
Синда униң қачан сүрәткә елинғанлиқи тоғрисида мәлумат йоқ. Шаухоңшудики сүрәтләрдә бир чач ясиғучиниң өгзидә, сөсүн рәңлик ғува чирағ нури астида ишләватқан көрүнүши, син ишлүгүчиләрниң икки парчә коллектип сүрәти көрситилгән. Бу язмиға #AblajanAwutAyup вә #完美 дейилгән хәткучләр ишлитилгән. Көзәт тори бу синни тәшвиқ қиливатқан сәнъәткарлар һесабини нәвәттә кимниң башқуруватқанлиқини ениқлимиди.
Буниңға мунасивәтлик «Aj流行团队» намлиқ бир таратқу һесабида, 2026-йили 10-айниң 3-күни тарқитилған «Заман чолпанлири» (时光星册) намлиқ топлам елан қилинған болуп, чүшәндүрүшидин қариғанда буниму охшаш музика ширкитиниң ишләп тарқатғанлиқи, Аблажанниң 12 вәкиллик әсириниң қайта ишлинип киргүзүлгәнлики дейилгән. Дәмәк бу топламға Аблажанниң 12 йеңи нахшиси киргүзүлгән әмәс, бәлки бурунқи нахшилири таллинип топлам қилинған.
Сүрәт чүшәндүрүши: «Aj流行团队» һесаби тарқатған бир тәшвиқат учурида, Аблажанниң нахшилар топлими «Заман чолпанлири» тәшвиқ қилинған болуп, екрандики текисттә аңриғучиларға униң йеңи һесабиниң «Чишуй» (газлиқ су) музика суписида икәнлики уқтурулған. Көзәт бу һесабни кимниң башқуруватқанлиқини дәлиллимиди. (Иҗтимаий таратқулардин елинған екран көрүнүши)
Буниңға охшаш учурлар аңриғучиларни Аблажанниң Чишуй музика суписидики йеңи һесабиға җәлп қилиду. У йәрдә униң толуқ исми йезилған бир архивта юқириқи топламниң чүшәندүрүлүши тәкрарланған болуп, «Омақ җананим» вә «Мәшрәп наваси» қатарлиқ нахшилириниң исми көрситилгән. Көзәт уни кимниң башқуруватқанлиқини дәлиллимиди.
Аблажанниң Қайтип Кәлгәнлик Аламәтлири
9-өктәбир «爱妃啦» (Элфирә – Alfire) ниң таратқу һесабида елан қилинған бир нахша топлимида, Аблажанниң өй ичидики бир сорунда бир аял билән биллә чүшкән сүрәтлири вә син көрүнүшлири берилгән. Сүрәткә елинған вақит көрситилмигән һәмдә ениқланмиған.
Мәзкур һесабниң аптори «AJ ниң йеңи нахшиси ахир кәлди» дәп язған болуп, өзиниң йерим йил илгири бу нахшини тунҗи қетим аңриғанлиқини вә тәйнәрлиқ қилишқа олтә ай вақит сәрп қилғанлиқини қошуп қойған. Әгәр бу тоғра болса, бу нахша тәхминән 2026-йили әтиязда униң кәсипдашлири вә йеқинлири арисида тарқилишқа башлиған болиду. Әмма бу, сүрәтләрниң тартилған вақтини көрситишмәйду.
Шу күни Гүлмирә Турғунниң (хитайчә 古丽米拉吐尔洪 дәп йезилған) Үндидар һесабида тарқитилған бир учурда, униң Аблажан билән чүшкәن сүрәтлири чиқирилған. Уйғурчә илавиди: «Йерим йил алдида чүшкән рәсимни чиқиридиған вақит кәпту-дә. Йеңи нахшилар мубарәк болсун, йәниму утуқлиқлар сизгә яр болсун Аблажан.» дәп йезилған. Хитайчә бир қурдиму йеңи нахшисиниң тарқитилғанлиқи тәбрикләнгән. Бу сүрәтләрниң ениқ вақти дәлилләнмиди.
