Yaponiye parlamént ezasi arfiye eli yaponiye libéral démokratlar partiyesining mu’awin bash katipliqigha teyinlendi

Yaponiye awam palatasining ezasi arfiye eli 25-séntebir X hésabida élan qilghan bayanatida, hökümet béshidiki libéral démokratchilar partiyisining mu’awin bash katipliqigha teyinlen’genlikini bildürdi. U aldi bilen yapon tilida, andin in’gliz tilida uchur yollap, özining tashqi ishlar ministirliqidiki wezipe mudditini ötken hepte axirlashturghanliqini éytti.

Bash ministir mehkimisining melumatigha köre, arfiye eli bash ministir shigéru ishiba 2024-yili noyabirda 2-qétim teshkilligen ichki kabéntta yaponiye parlaménti tashqi ishlar mu’awin ministiri bolup wezipe ötigen bolup, bash ministir sana’e takaychining rehberlikidiki kabénttimu bu wezipisini dawamlashturghan. U özining bu wezipe ötesh mudditini ikki bash ministirning rehberlikide arqimu arqa kelgen üch nöwetlik wezipe dep teriplidi.

Arfiye eli in’gliz tilida yollighan uchurida, yéngi partiye wezipiside «partiyening pa’aliyetlirini qollash we zaman’gha maslashturush» üchün tirishidighanliqini, shundaqla siyaset belgilesh jeryanida özining saylam rayoni bolghan ichikawa we urayasudiki ammining arzu-isteklirini eks ettürüshke kapaletlik qilidighanliqini bildürdi.

«Yaponiye waqti» gézitining xewirige qarighanda, fukuka wilayitining kyushu shehiride tughulghan arfiye elining dadisi uyghur, anisi özbék bolup, 1999-yili 10 yéshida yaponiye puqraliqigha ötken. U jorj tawn uniwérsitétida oqughan bolup, ilgiri yaponiye merkiziy bankisi we birleshken döletler teshkilatida xizmet qilghan. «Yomyuri shimbun» gézitining xewer qilishiche, u tunji qétim 2023-yili aprélda chiba wilayitining 5-rayoni boyiche ötküzülgen parlamént ezalirini toluqlash saylimida awam palata ezaliqigha saylan’ghan. U 2024-yili öktebirdiki omumiy saylamda mezkur rayonda utturup qoyghan bolsimu, lékin jenubiy kanto awaz nisbitige wekillik qilish rayoni arqiliq parlaméntqa qaytip kelgen we 2026-yili féwralda chiba 5-rayonidiki saylamda ghelibe qilip ornini qayturuwalghan.