Starbaks ürümchide tunji dukanlirini achti
Xitay axbarat wasitiliri starbaksning ürümchide tunji dukanlirini achqanliqini xewer qildi, emma starbaks buni özining in’gliz tilidiki shirket xewerliri tor bétide élan qilmidi.
Xitay «shinxu’a agéntliqi»ning xewer qilishiche, starbaks 29-séntebir uyghur aptonom rayonining merkizi ürümchide tunji ikki dukinini achqan. Starbaks 1-öktebir küni, yeni xitayning dölet bayrimi dem élishining birinchi künidin bashlap, xitaydiki 41 sheherde «shinjang alahidiliki» bolghan yémeklik we ichimliklerni satidighanliqini bildügen.
Xitaydiki starbaks 29-séntebir özining «wéybo» (Weibo) hésabida élan qilghan uchurida: «starbaksning xelq’ara chong bazardiki abide xaraktérlik medeniyet mirasliri bayraqdar dukini resmiy échildi» déyilgen. Uchurda xéridarlar «yultuz bazar»da méhman bolushqa teklip qilin’ghan bolup, u yerde «gheyriy maddiy medeniyet miraslirigha a’it toqumichiliq sen’itidin zoqlinish» bilen birge «cheklik sandila teminlen’gen temlerdin hozurlan’ghili» bolidighanliqi bildürülgen. Uchurdiki sinda etlestin tikilgen chipaw uslubidiki kiyimni kiygen bir modélning dukan taxtisi yénida starbaks longqisini tutup turghanliqi körsitilgen.
«Shinxu’a agéntliqi»ning bildürüshiche, starbaksning bir dukini ürümchidiki chong bazargha jaylashqan bolsa, yene biri ürümchi tengritagh xelq’ara ayrodurumida échilghan iken.
Xitaydiki starbaks shu küni élan qilghan bashqa bir «wéybo» uchurida, 41 sheherge tarqitilidighan töt xil «shinjang alahidiliki» bolghan mehsulatni körsetken bolup, bular qaymaq temlik süt chay, méghizliq baqlawa, méghizliq shakilat baqali we sürlen’gen paqlan göshi qatarliqlar iken. Starbaks yene xéridarlargha 1-öktebirdin bashlap starbaks ep détali yaki addiy programmisi arqiliq zakaz qilishni eskertken. Uchurdiki sinda qizil keshtilik doppa we yaghliq artqan bir éyiqchaq körsitilgen. Her ikki uchurda «dölet bayrimida shinjang temini tétish üchün starbaksqa kéling» dégendek heshtegler orun alghan.
«Shinxu’a agéntliqi»ning xewer qilishiche, xitaydiki starbaksning bash ijra’iye emeldari molli liyu (Molly Liu) yazma bayanatida mundaq dégen: «shinjanggha kirishimiz dukan torimizning téximu kéngeygenlikini bildürüpla qalmastin, belki bizning bu awat bazar bilen chongqur munasiwet ornitishimizgha we bu yerdiki xéridarlirimiz bilen semimiy, uzun muddetlik alaqe baghlishimizgha yol achidu.» Uyghur aptonom rayonluq mal baha we bazar tengshesh idarisining emeldari jang yü «shinxu’a agéntliqi»gha qilghan sözide, bu rayonning ichki éhtiyaj we istémalni ashurushtiki muhim tüwrüki süpitide «tunji dukan iqtisadi»ni yolgha qoyghanliqini bildürgen.
Boyu kapital (Boyu Capital) bashqurushidiki fondlar 2-apréldin bashlap starbaksning xitaydiki parche sétishlirining 60 pirsent pay hoquqigha ige bolghan. Boyu kapital xongkong, béyjing, shangxey we sin’gaporda shtabi bar meblegh sélish shirkiti hésablinidiken. Starbaks 40 pirsent paygha ige bolup, öz markisigha igidarchiliq qilidiken. Kishini te’ejjüplendürdighini shuki, 29-séntebergiche bu dukanlarning échilish xewerliri starbaksning in’gliz tilidiki xewer sehipiside yaki «asiyadiki starbaks hékayiliri» (Starbucks Stories Asia) tor bétide élan qilinmighan.
Starbaks shirkiti bu xewer chiqqan’gha qeder «közet»ning so’allirigha jawab bermidi.
Amérika tashqi ishlar ministirliqi 2021-yili 1-ayda xitay hökümitining uyghurlargha qarshi irqiy qirghinchiliq élip bériwatqanliqini békitken idi. «Shinxu’a agéntliqi» ürümchidiki dukanlarning échilishini starbaksning bu rayondiki tunji qedimi süpitide teripligen.
«Közet» starbaks shirkitining uyghur aptonom rayonida achqan dukanliri üstide tekshürüsh we tetqiqat élip bériwatqan bolup, kelgüside téximu tepsilatliq doklat élan qilidu.